تعالا اعرفك علي أهم أسباب ضعف سحب السيارة وزيادة استهلاك البنزين وطرق معالجتها.
1 – فلتر الهواء .
فلتر الهوا طبعا مؤثر جدا لو مسدود او مش نضيف بيأثر على العربية جدا و دة عن تجربة
جرب تنضف فلتر الهوا بتاعك لو لسة جديد هتلاقى السحب اختلف و ياريت كل 20 الف تغيرة .. و تجيب واحد جديد
2- بوابة الهوا او بوابة الثروتل
لو مش نضيفة هتلاقى الموتور ميت مش ضعيف بس .. فكها كل فترة كدة و نضفها
لانها هي المسؤله عن دخول الهواء الى غرفة الاحتراق ولو مفيش هواء صح انسي يكون فى حرق صح ..
3 – البنزين .
شوف يا سيدى دورة البنزين لو مش نضيفة فيها شوايب يعنى هتقلل من سحب العربية
حط من بنزين نضيفة بقى
غير فلتر البنزين كل 25 الف كيلو
كل 3 شهور ابقى حط مرة اوكتان عشان تخش تنضف دورة البنزين و تخش على الرشاشات تنضفها و لو عربيتك بتاخد 92 حطلها برضة 95 كل 3 شهور مرة مع الاوكتان هتعمل معاك شغل فاجر و ربنا و حاول كل فترة تفك التانك وتغسله عشان الشوائب
.
.
4 – البوجيهات و سلوكها .
البوجيهات مهمة جدا و الناس لما بتيجى تغير البوجيهات مش بتغير السلوك و لازم كل 25 الف كيلو تغير طقم البيجوهات
لان مع الوقت بتتكون طبقة كاربون كبيرة عليها وشراراتها ضعيفة و بالتالى السحب بيقل
وكمان ممكن العربية ماتدورش معاك من اول مرة عشان البوجيهات ضعفت خلاص
وحاول كل فترة تفك البوجيهات و تشوف شكلها عشان هيه بتعرفك الاحتراق شكله ايه.
5 – الفتيس .
● الفتيس طبعا مهم جدا فى نقطة السحب ..
لو الاسطوانة و الديسك متاكلين و بيجيبو اخرهم بيخلى سحب العربية يقل و كمان يخلى العربية تسخن فوق العادى و كمان هتحتاج تعزم ليها جامد لان الاسطوانة بتكون فضيت و بالتالى هتاكل بنزين زيادة
6 – الكاوتش .
● الكاوتش علية عامل كبير جدا ..
لو الطبقة مشققة او متاكلة او عديت ال 35 – 40 الف كيلو بالكاوتش اللى معاك يبقى ياريت تغيرة احسن … لانة بيبقى كمان عرضة انة ينفجر او يفتل معاك فى اى لحظة و كمان هياكل بنزين و يقلل السحب
7 – حساس الشكمان .
● او اللى اسمة حساس الاكسجين دة لو بايظ او بيودع الحياة خليط الهوا و البنزين مش هيبقى بالنسبة المظبوطة و يقلل السحب
وتقريبا دا اغلب مشاكل العربيه (القاتل الصامت ) يقلل سحب وياخد ضعف استهلاك البنزين
8 – الرشاشات .
● ازاى ؟ لو فى رشاش تعبان .. هيعمل حاجة من الاثنين هيرمى بنزين زيادة عشان يولع مع الهوا و يتم الاحتراق و بالتالى العربية تاكل بنزين
او هيرمى بنزين اقل من المطلوب يقوم يسبب ضعف فى السحب طب و الحل ؟
طب و الحل ؟
انك تعمل اختبار رشاشات كل 50 الف كيلو و دة بيبقى عن طريق جهاز بيختبر قوة الرشاشات
و بينضفها و هتلاقية فى اى مركز صيانة نضيف .. وممكن بنفسك وهنعمل فديو مخصوص للتنضيف ..
إرسال تعليق