الموتور جاب جوان
بنسمع الجمله دى كتير اليومين دول
بسرعه نجرى على الميكانيكى
وبسرعه يقولك العربيه جابت جوان
ودا طبعا غلط وتسرع لأنه غالبا بيبقى من أثر رطوبة الجو الزايده واللى بتكثف ماء على غطاء تذويد الزيت للموتور فيعمل الشكل الطحينى ده
ايه هو الجوان ؟
هو طبقه رقيقه من مواد شبه لينه ليها قدرة على تحمل لدرجات الحراره
به فتحات للبساتم و فتحات لمرور الزيت والماء
فين مكانه ؟؟
يقع جوان وش السلندر كطبقه وسطيه فارقه ما بين البلوكه ( جسم الموتور السفلى ) و وش السلندر ( النصف العلوى للموتور )
وظيفته ؟؟؟
يعتبر طبقه حاكمه وفاصله شبه لينه مما يسمح بأحكام الرباط ما بين نصفين الموتور العلوى والسفلى الصلبين تماما
اسباب تلفه ؟؟؟؟
1 ارتفاع كبير جدا فى حرارة الموتور
2 عمر افتراضى
المهم
ازاى نعرف ان موتورنا جاب جوان ولا لأ ؟؟؟
ايه هى علامات بوظان الجوان ؟؟؟
من هنا يبدأ موضوعنا
بسم الله
لازم ولابد يتحقق شرط او اكتر من الشروط اللى هنقولها دلوقتى عشان نقدر نجزم ان العربيه جابت جوان
الا وهى
1 قربة الميه بتنقص بغباء
2 الميه بتغلى فى قربة الميه
3 الشكمان بيجيب مياه وبخار مياه طول النهار وفى عز الظهر والعربيه سخنه
4 بتفك البوجيهات بتلاقى بوجيه او اكتر مبلل ميه
(( فى ال4 حالات السابقه فى مجرى او اكتر من مجارى تبريد الموتور فى الوش فتحت على غرف الحريق مما يسبب غليان ونقص شديد للمياه ))
5 قربة الميه على وشها زيت اول ما نفتحها صباحا وغطائها ( عامله طحينه )
6 مقاس زيت الموتور عليه من فوق مياه وهى بارده صباحا
7 غطاء زيت الموتور عليه آثار ماء مختلط بزيت ( عامل طحينه )
(( فى ال 3 حالات السابقه بيكون مجرى او اكتر من مجارى الزيت والماء اللى بيمروا فى الوش فتحوا على بعض مما يسمح بأختلاط السائلين على بعض ))
8 الزيت بينقص بغباء
9 الشكمان بيجيب دخنه زرقاء بتهبط للأسفل ولا ترتفع لفوق ( دا الفرق ما بين بخار الماء وبخار الزيت بخار الماء يرتفع لفوق )
10 لو شيلت خرطوم الفايظ بتاع غطاء التاكيهات اللى داخل على العمه او المانفولد هتلاقيه بيجيب بخار زيت قوى وبخاصه مع القرص
11 لو فكيت البوجيهات ولاقيت بوجيه او اكتر على اقطاب حريقه آثار زيت ( ومش على السن بتاع الرباط ( الزيت على سن الرباط بيكون دليل على تلف جوان غطاء التاكيهات وليس جوان وش السلندر ))
(( فى ال 4 حالات السابقين بتكون مجرى او اكتر من مجارى الزيت الماره بجوان وش السلندر فتحت على غرف الحريق ))
12 صوت سكه غير مبرر ( صوت زى صوت التشريز او استعمال بنزين 80 ) بالرغم من استعمالك بنزين 92
(( فى الحاله دى ودى نادرة الحدوث اوى الجوان بيفتح ما بين غرفتين حريق متلاصقتين ))
13 ودا طبعا اهم دليل ( ضعف السحب والتجميع مع ظهور صوت سكه وتقطيع وغياب فى الدواره )
لو لا قدر الله موتورك تحقق فيه شرطين او اكتر من ال 13 شرط السابقين دول يبقى موتورك جاب جوان وش سلندر
والحل طبعا تغييره فى اسرع وقت وعند صنايعى محترم (((( وبجوان اصلى ))))
بكده نكون خلصنا موضوعنا بفضل من الله
لو استفدت ياريت تعمل لايك وشير مش كتير علينا 
إرسال تعليق