لو انت معدي ف المدونة وزهقان من الأخبار اللي مالهاش لازمة، خليني أسألك سؤال غريب يخليك تفكر وتتسحل ف المعاني الخفية اللي وراه.. هو فين الفضائيين؟!! 
كل الأعمال السينمائية ونظريات المؤامرة وقصص الرعب اللي اتكتبت عنهم دي.. كل الكلام والرغي الكتير، عن الموضوع اللي محتل تفكير بشر كتير جدًا.. ده الموضوع وصل لدرجة إن في فيديوهات اطلعتها وزارة الدفاع الأمريكية اللي مقرها البنتاجون Pentagon من فترة، وبتظهر فيها التجارب اللي مر بيها بعض الطيارين الأمريكيين مع الأجسام الطائرة المجهولة أو ال Unidentified Flying Objects، أو اللي بيسموه اختصارًا UFOs.. تخيل أنت..
تخيل لما وزارة الدفاع الأمريكية نفسها تتكلم عن الموضوع وتطلع فيديوهات مؤكدة ومالهاش تفسير.. تقدر تشوف مصدر عليها هنا من النيويورك تايمز:
وتقدر تشوف لقطات من الفيديوهات الرسمية اللي طلعت من البنتاجون في الكومنتات 
وبرغم كل ده، بردو لسه لحد دلوقتي محدش عارف يجاوب على السؤال بتأكيد يريحك وأنت بتسمع كده..
السؤال ده بيسأل باختصار هما لحد دلوقتي مظهروش ليه، وليه احنا لحد دلوقتي مشفناش ليهم أثر واحد في المجرة كلها، بيدلل على إن في جنس فضائي عاقل وذكي غيرنا إحنا بس، في المجرة بأكملها؟!!
هل فعلًا البشر متميزين و Special أوي كده، لدرجة إنهم يكونوا الجنس الحي الوحيد الموجود في الكون كله؟!!
هل إحنا بس اللي قدرنا إننا نتطور على مدى آلاف السنين، لحد ما وصلنا للشكل بتاعنا الحالي، بكل تقدمنا التكنولوجي ده؟!.. ومفيش أي جنس تاني في أي مكان تاني في المجرة بتاعتنا دي، قدر إنه يتطور حضاريًا ويوصل لتكنولوجيا متقدمة زينا؟!
الأزمة الوجودية اللي أنا عرضتها عليك في الدقايق اللي فاتت دي هي أزمة شهيرة جدًا في أوساط علم الفيزياء النظرية وعلوم الفضاء والأستروفيزيكس، إسمها (مُعضِلَة فيرمي أو Fermi Paradox)
المعضلة دي مفيش عالم واحد في العالم كله عارف يجاوب عليها أو يحلها بيقين وتأكيد كامل!! بس في محاولات كتير بتحط افتراضات أغرب من الخيال، وهتذهلك حرفيًا.. تعالى نتكلم فيها مع بعض بالراحة كده، ومتنساش كوباية الشاي بالنعناع الجميلة ف إيدك 
أول حاجة، تعالى الأول أحكيلك عن حاجة إسمها معادلة دريك Drake’s Equation..
المعادلة دي حطها عالم فلك وأستروفيزيكس أمريكي إسمه د. فرانك دريك Dr. Frank Drake سنة 1961.. وهي باختصار بنستعملها في إننا نحاول بأكبر قدر ممكن من الدقة، إننا نحسب احتمالات وجود حياة ذكية في الكون غيرنا، بتحاول تتواصل معانا أو مع حضارات تانية غيرنا..
دي صيغة المعادلة أهي:
N = R* × Fp × ne × Fl × FI × Fc × L
الـ N بترمز لعدد الحضارات فى مجرة درب التبانة التي ممكن إننا نستقبل منها استقبال إشارات كهرومغناطيسية Electromagnetic، أو ممكن إننا نتواصل معاها عمومًا.
الـ *R بترمز لمعدل تكوين النجوم في المجرة بتاعتنا.. يعني النجوم بتتكون بمعدل كل قد ايه..
الـ FP بترمز لنسبة النجوم اللي في حواليها كواكب..
الـ ne بترمز لعدد الكواكب فى كل نظام شمسي من دول، اللي عليها ظروف بيئية صالحة للحياة..
الـ FL بترمز لنسبة الكواكب الصالحة للحياة، والتي ظهرت عليها الحياة فعليًا في نقطة من التاريخ..
الFI بترمز لنسبة الكواكب اللي ظهرت عليها حياة دي، واللي قدرت بعدها إنها تتطور لحياة ذكية وعاقلة زي البشر كده أو أعلى كمان..
الـ FC بترمز لنسبة الحضارات الذكية دي، اللي قدرت تطور تكنولوجيا تخليها تطلق إشارات في الفضاء تكشف عن وجودها للأجناس المتطورة التانية.. زي البشر كده ما بينتجوا موجات راديو وموجات كهرومغناطيسية وغيرها..
الـ L بقى بترمز لطول المدة الزمنية اللي الحضارات دي فيها كانت بتطلق الإشارات اللي بتكشف عن وجودها دي بشكل مستمر..
يا سلاااام.. مسم.. معادلة متخرش المية.. حاجة عنب يعني.. بس فيها مشكلة بسيطة خالص..
المشكلة إننا عدم اللامؤاخذة يعني، منعرفش أي قيمة من القيم اللي في المعادلة دي لحد دلوقتي!!.. وعشان كده التوقعات صعبة على علماء الأحياء الفضائية أو الـ Astrobiologists حضرتك.. أصل هنتوقع حاجة إحنا مش عارفينها ازاي؟!
طب عشان احنا مش عارفين نتوقع يعني، هنسكت كده وخلاص؟!.. لأ طبعًا.. الخيال البشري عامل زي واحد قاعد على بيضة كده.. عمره ما هيهدى..
في كذا احتمال خيالي بيحاول يفسر سبب عدم اكتشافنا لأي حضارة في الكون غيرنا لحد دلوقتي.. خلينا نمر عليهم سريعًا كده..
الإحتمال الأول معروف.. مفيش حياة أصلًا في الكون غيرنا.. مش محتاجة ذكاء يعني.. والإحتمال ده بيقول إن الكوكب بتاعنا، والحضارة الأرضية عمومًا ممكن تكون نادرة جدًا لدرجة إنها متكررتش غير مرة واحدة بس.. والموضوع خد حوالي 3.5 مليار سنة عشان الحضارة الذكية دي تتطور.. وحصلت مرة واحدة بس..
يعني إحنا طلعنا مميزين يا جماعة.. والحقيقة مش عارف لما كل اللي احنا فيه ده و مميزين، أومال لو كنا مش مميزين كنا هنبقى عاملين ازاي؟!
ما علينا.. بلاش نفكر ف الحوار ده كتير عشان منتعبش..
المهم.. الإحتمالات التانية بقى بتفترض إنهم موجودين فعلًا، بس احنا مش عارفين نرصد وجودهم لأسباب معينة..
السبب الأول مثلًا، هو إنهم ممكن يبقوا موجودين بس مش بيتواصلوا معانا.. هتسألني ليه هقولك معرفش.. ممكن يبقوا تنكين ومغرورين ف نفسهم كده.. يعني عاملين زي محمود العسيلي كده، وإحنا مش معانا واسطة عشان نتصور معاهم..
لو هنتكلم بجد، هنقول إنهم ممكن يكونوا متطورين جدًا لدرجة إنهم أصلًا مش فارق معاهم إنهم يتواصلوا معانا.. يعني تخيل مثلًا إنك رايح تقابل واحد صاحبك وطالع على السلم للبيت بتاعه، وشفت شوية نمل بيجروا على جنب.. هيفرق معاك تقف تتعرف على النمل ده؟!.. هو المثال بالظبط نفس الفكرة، مع فرق إن النملة بالنسبالنا تعتبر متطورة جدًا لو قارنناها بشكلنا إحنا بالنسبالهم..
حضارات زي دي هتبقى متطورة لدرجة إنها هتبقى بالنسبالنا حاجة أشبه بالآلهة.. مستحيل نفهمهم مهما حاولنا، ولا نفهم نواياهم ولا حياتهم ولا هما عايزين أيه، حتى لو فكروا يتواصلوا معانا.. يعني عايز تقنعني إنك تقدر تفهم النملة يعني ايه انترنت وموبايل وحمو بيكا؟!.. أنا متهيألي لو حاولت تفهم حمو بيكا نفسه يعني أيه حمو بيكا، مش هيفهمك بردو..
وباتون باليه بالسمسم هات 
في احتمال كمان إسمه فرضية حديقة الحيوان أو The Zoo Hypothesis.. الإحتمال ده بيفترض إن ممكن تكون الكائنات الفضائية دي موجودة بالفعل حوالينا وبتراقبنا، بس مبتتدخلش في حياتنا خالص ولا بتخلينا نعرف إنها موجودة أصلًا، عشان متأثرش على التطور بتاعنا خالص، ويفضل ماشي طبيعي.. وفي فرضية متفرعة منها إسمها فرضية المعمل The Laboratory Hypothesis بتقول إنهم موجودين، وبيعملوا علينا تجارب من غير ما احنا نحس أصلًا.. يعني مثلًا ممكن يكونوا بيعملوا تجارب على الأرض والبشر، ومثلًا بيعملوا ما بيننا حروب، وبعدين يسجلوا النتايج دي عشان تفيدهم كدراسة بيولوجية مثيرة.. أو مثلًا يخطفولهم واحد ولا اتنين مننا عشان يشرحوهم ويعملوا عليهم تجارب..
خُفت؟!.. طب خلاص خلاص.. تعالى نشوف السبب التاني..
السبب التاني بيقولك إنهم موجودين فعلًا، وبيتواصلوا معانا فعلًا، بس إحنا مش قادرين نفهمهم ولا نحس بإنهم بيتواصلوا معانا.. يعني مثلًا ممكن تكون التكنولوجيا بتاعتهم مختلفة عننا بشكل جذري، مستحيل معاه إننا نقدر نحس أصلًا إنهم بيحاولوا يوصلولنا..
هبسطهالك.. تخيل مثلًا إنك بتحاول بتفكيرك المحدود تدور على شعب بيبعت حمام زاجل لبعضه عشان يتواصلوا مع بعض.. بس اللي انت متعرفوش هو إن الشعب ده متطور جدًا لدرجة إنه بيستعمل الإنترنت في التواصل.. فيسبوك ميسنجر و واتساب بقى وهكذا.. هل أنت عمرك هتعرف تشوفهم؟!!.. لأ طبعًا.. أنت هتبقى عمال تدور على حمام زاجل، وهما عايشين عادى ع الواتساب بيحاولوا يندهوا عليك، وأنت ممعاكش أصلًا موبايل! 
السبب التالت بيقولك إنهم كانوا موجودين في فترة إحنا ما كناش موجودين فيها على الأرض أصلًا، ولا كنا اتولدنا حتى..
عمر البشر بالنسبة لعمر الكون هو أقصر من لمح البصر.. إحنا حرفيًا لسه ولاد امبارح بالنسبة لعمر الكون.. والتكنولوجيا الحديثة بتاعتنا بقالها 100 سنة مثلًا ولا حاجة.. قارن ده بعمر الكون اللي هو 13.7 مليار سنة، وهتفهم إننا أصلًا لسه عيال بنلبس كوافيل..
ممكن الكائنات دي تكون كانت عايشة ومرت فعلًا على كوكب الأرض، قبل ما الإنسان نفسه ييجي ويتولد.. وممكن تكون اتدمرت مثلًا بكارثة كونية ولا حاجة.. أو ممكن تكون لسه موجودة، بس هي عدت علينا ومشيت خلاص، وفاكرة لحد دلوقتي إنه مفيش حياة ع الأرض..
السبب الرابع هيعجب الناس اللي بيحبوا نظرية المؤامرة أوي.. بيقولك إنهم موجودين حوالينا ومعانا ع الكوكب، بس إحنا منعرفش إنهم موجودين.. جو بقى الماسونية والـ Illuminati ومجلس إدارة العالم اللي بيتعامل مع الكائنات الفضائية، وهي اللي بتحكمنا في السر.. وهيطلعوا في آخر الفيلم إنهم زواحف أو رماديين والحاجات دي.. وعايشين حوالينا متخفيين في صورة بشر أو متخفيين عمومًا في أي صورة..
أنا بالنسبالي النظرية دي بتقدم تفسير مقنع فشخ لماهية أحمد موسى ومصطفى بكري وعمرو أديب..
بصلي ف عيني كده وقولي إنهم مش كائنات فضائية!!
السبب الخامس بقى غريب شوية، ومرعب..
بيقولك إن في حضارات فضائية كتير بتبدأ وبتتطور.. بس بتوصل لمرحلة معينة وبتتدمر بسبب كارثة كونية معينة.. ومفيش أي حاجة بتقدر تعدي من الفناء ده..
الكارثة الغامضة اللي بتدمر الحضارات دي بيسموها (المُرَشِّح العظيم The Great Filter).. ومحدش يعرف ماهيتها ايه بالظبط، ولا هي بتيجي امتى، ومرت علينا أصلًا ولا ما مرتش..
ممكن مثلًا تبقى الكائنات الفضائية المتطورة لما بتوصل لمرحلة معينة من التطور التكنولوجي، بتدمر نفسها بنفسها.. بالظبط زي ما احنا على وشك إننا نعمل ف بعض بالقنابل النووية مثلًا..
ممكن بردو إنهم مبيقدروش يعيشوا لفترة طويلة توصلهم لإنهم يسافروا برة الكواكب بتاعتهم، وبيتدمروا دايمًا قبلها بسبب نيازك أو انفجارات شمسية أو أي كارثة من الكوارث الكونية الشنيعة دي.. زي اللي حصل مع الديناصورات مثلًا من ملايين السنين..
في افتراض كمان مرعب جدًا، وبيرعبني بشكل شخصي.. تعالى أحكيهولك.. ماهو أنا مش هترعب لوحدي..
الإفتراض ده بيقولك إن ف حضارة قديمة قوية جدًا، ومتطورة بشكل مرعب وغير قابل للإستيعاب.. الحضارة دي وصلت لمرحلة من التطور خلاهم أشبه بالآلهة كده.. محدش قادر يستوعب وجودهم أصلًا..
وخد عندك الرعب بقى..
الحضارة دي عشان تحافظ على تطورها وقوتها دايمًا للأبد، وتضمن إن مفيش أي حضارة غيرها تقدر تتطور لدرجة تقدر معاها إنها تنافسها أو تهددها، ف هي كل فترة كده لما بتشوف في حضارة قوية ابتدت تظهر في الكون، بتروح للحضارة دي وتدمرها تمامًا!!
يعني لو حد فيكم لعب لعبة Mass Effect أو على الأقل عارف القصة بتاعتها، هيفتكر جنس كائنات الـ Reapers اللي كانت كل فترة أو Cycle متكونة من كام ألف سنة، بترجع للحضارات اللي في المجرة وتدمرها كلها عشان متتطورش أكتر من كده..
هو الموضوع هنا بيتكلم ف نفس الفكرة..
تخيل كده.. تخيل إن ممكن تكون في حضارة متطورة في الكون بتراقبنا كده وبتشوف إحنا هنوصل لتطور ايه.. لو دمرنا نفسنا بنفسنا يبقى خير وبركة.. كفينا و وفرنا.. بس لو فضلنا نتطور لدرجة نشكل فيها خطر على وجودهم، ف هما هيجولنا ويمسحونا من ع الخريطة بأستيكة حرفيًا..
تخيل إن ممكن تكون في حضارة زي دي موجودة في الكون، بتدور على الحضارات الذكية عشان تيجي وتدمرها، وإحنا زي الهبل عمالين نبعت إشارات راديو للكون، ونحاول نتواصل مع أي حد، ونبعت أي إشارة لأي حتة.. كإننا بنقولهم هي هي هو هو.. إحنا هنا تعالوا دمرونا يالا!!
الإحتمال مرعب.. والمرعب أكتر هو إنه مش الوحيد..
في احتمالات كتير جدًا.. أكتر من قدرتنا على الحصر.. وكلها أغرب من بعضها.. ومدى قابليتها للتصديق بيعتمد عليك أنت عزيزي المشاهد (أو عزيزي المتفرج عشان منقلدش الدحيح)..
هل انت مصدق أو مقتنع بأي نظرية من النظريات دي؟!
هو ده السؤال.. وهستنى إجابتك وتحليلك ليه تحت في الكومنتات
وشوف الكومنتات بتاعتي عشان فيها حاجات مهمة
المهم.. عايز أفكرك إن المقال والبحث ده تعبني جدًا في تجميعه وتنسيقه وكتابته. ف لو عجبك متنساش الشير دعمًا للمجهود، وعشان تساعدني في نشر المعلومة الشير بتاعك مهم جدًا بالنسبالي، ف متبخلش به على المحتوى لو شايفه يستحق ويا ريت بلاش كوبي بيست من فضلكم لإنه بيضيع المجهود ده وبينسبه لناس آخرين..
الشير بتاعك مهم جدًا بالنسبالي، ف متبخلش به على المحتوى لو شايفه يستحق ويا ريت بلاش كوبي بيست من فضلكم لإنه بيضيع المجهود ده وبينسبه لناس آخرين..إعملوا منشن لأهلكم وصحابكم من المهتمين بالموضوع، ومتنسوش تسيبولي رأيكم وتحليلاتكم وأسئلتكم هنا في الكومنتات
شوفوا المصادر دي لو عايزين تعرفوا اكتر:
شكرًا لحسن استماعكم
إرسال تعليق