لو أنت معدي ف المدونة، وعايز تشوف حاجة تتمع بيها وتبسط عيونك، فالنهارده أنا مش هرغي كتير ولا هتكلم عن جمال الفضاء والكون الواسع، ولا هقعد أأكدلك قد ايه اللي فيه أعظم من الحياة وأغرب من الخيال.. أنا هسيبك بس مع شوية الصور دي، اللي هتبينلك بعض من أعظم اكتشافات وانجازات الجنس البشري كله في مجال علوم الفلك والفضاء والأستروفيزيكس في القرن العشرين والواحد والعشرين.
الصور اللي انت هتشوفها قدامك دي بتمثل الطموح البشري كله، منذ بداية عصر اكتشاف الفضاء، وبتوريك قد ايه البشر ممكن يوصلوا لمستقبل عظيم ويعملوا انجازات مذهلة، لو اشتغلوا مع بعض كجنس واحد بدون تفرقة.. قد ايه لو اتعاوننا وبطلنا حروب وخلافات سياسية وأيديولوجية، ممكن نوصل لحدود المستحيل نفسه.
شوف الصور وهتلاقي على كل صورة شرح ليها، واعمل منشن لصحابك وحبايبك من المهتمين بالموضوعات دي، ومتنساش الشير عشان غيرك يشوفها ويستفيد.. البوست وكتابته تعبني وخد أكتر من ٦ ساعات في الكتابة والشرح.. والشير بتاعك بيساعدني في الوصول بالموضوعات اللي زي دي لعدد أكبر من الناس، ف متبخلش به لو شايف المجهود يستحق 
بص على الكومنتات بردو عشان فيها صور متحركة مهمة 
مستني رأيك وأسئلتك تحت هنا ولو الموضوع عجبكم هكرره تاني مستقبلًا.
ولو الموضوع عجبكم هكرره تاني مستقبلًا.
صورة تم التقاطها سنة ١٩٦٩ أثناء مهمة أبوللو ١١ أو Apollo 11 لأثر نعل البوت بتاع رائد الفضاء الأمريكي باز ألدرين Buzz Aldrin على تربة القمر.. الصورة بتبين الفخر والإعتزاز الأمريكي بكونهم أول شعب ينزل رواد فضاء بشريين أحياء على القمر، ويسيبوا أثر وجودهم هناك على بعد آلاف الأميال من الوطن والكوكب نفسه.. وتعتبر رمز للتفوق الأمريكي وفخر كبير لوكالة ناسا لأبحاث الفضاء. وفخر الجنس البشري كله إنه ف يوم من الأيام وصل للمكان ده.
اللي قدامك دي هي أول صورة حقيقية وغير معدلة بالجرافيك بأي شكل، في التاريخ البشري كله، يتم إلتقاطها لثقب أسود حقيقي.. اللي انت شايفه في الصورة ده هو الثقب الأسود الموجود في مركز مجرة Messier 87، وهو موقعه على بعد أكتر من ٥٤ مليون سنة ضوئية من كوكب الأرض.. الثقب الأسود اللي قدامك ده جواه شايل كتلة أو Mass تقدر بحوالي ٦ ونص مليار مرة من كتلة الشمس بتاعتنا..
الصورة اتعلن عنها لأول مرة يوم ١٠ إبريل سنة ٢٠١٩، وكانت ناتج تعاون عالمي بين عدد كبير جدًا من التليسكوبات في أكتر من دولة في العالم، وبقيادة مؤسسة ناسا NASA الأمريكية لأبحاث الفضاء
بشكله اللي شبه عين اللورد ساورون Sauron في سلسلة أفلام "سيد الخواتم" Lord of the Rings لتولكين، اللي قدامك ده هو تجمع غازات كونية كبرى ناتجة عن إنفجار شمس وفناءها في الفضاء.. تجمع الغازات ده بيسموه (السديم) أو Nebula.. ويقع على بعد ٢٠٠٠ سنة ضوئية عن الأرض.. وهو حجمه أكبر بكتير من ما ممكن تتخيل..
تخيل إن الشكل الكوني العظيم اللي قدامك ده عرضه حوالي سنة ضوئية كاملة!! سبحان الله على جماله
إرسال تعليق