هنتكلم النهاردة فى نقطة مهمة ..وهى تعمل اية لو جيت تدوس فرامل و لاقيت الفرامل عطلانة ؟!!
موقف ربنا مايورية لحد بس لازم تبقى عارف هتعمل اية!
خليك واثق ديما ان مش هيحصل حاجة غير لو اتعاملت مع الموقف غلط ...
طبعا من الخضة تفكيرك هيقف بس مع المواقف دى مينفعش تفكيرك يقف و لازم دماغك تكون حاضرة كويس اوى ..
قبل اى خطوة تعملها جرب تكارك للفرامل كذا مرة ورا بعض
دوس عليها جامد و بصورة مفاجأة و بسرعة
دوسات متكررة طب لو مفيش نتيجة يا اسطوات تعملوا ايه ؟!! 
يبقى تعالى شوف الخطوات دى .. و اسمع مني البؤين دول 👂👂
1 - ملاقيش حد يقولى أبطل العربية و اسبها تقف
طب انت لما تبطل العربية الدريكسيون هيلف ازاى !! يعنى لو فى حاجة قدامك فى فرصة انك تهرب منها هتقول لا و الله معلش نخليها وقت تانى 😂 عشان انا فاصل و مبطل العربية !!! 😃
ياجدع قول كلام غير دة .. تمام كدة ادي اول حاجة حتتعمل عشان انا هارش الدماغ
2 - لو عربيتك مانيوال يبقى انت خلاص فى امان تام يا كبير
حتى لو ماشى 180 حتقولي ليه ؟! و ازاي يا ميدو ؟! و تبقي مستغرب و تعمل كدا 🤔 و تقعد تفكر ..
بص يا حبي بلاش حبي دي عشان السيدات و البنات اللي معانا.. بصوا يا حبايبي
انتوا دلوقتى جايبين الغيار الخامس و طايرين بالعربية بتدوسوا فرامل ملاقتهوهاش !! 😱
لسة هتفكروا كتير و تتخضوا ؟ لاااا علي طول حطوا دبرياجكو و انزلوا للرابع هتلاقوا صوت الموتور على معاكوا و العربية بتعمل تفصيل المكنة بتفصل منكوا لانك لما بتسقط غيار ال RPM بيعلى وش يا معلمين 😎
استنوا لحد لما ال Rpm يهدى شوية و روحوا نازلين على التالت هتلاقوا برضوا صوت الموتور بقى عالى
افضلوا سقطوا غيار لحد لما تنزلوا لحد الاول و بعد كدة خلاص العربية بتهدي و ترعش و تروح مبطلة و الف حمد لله علي السلامة يا حبايب قلبي 😍
3 - الهاند بريك ... بس متبقاش ماشى 100 ولا 120 و تروح جاى شادد الهاند كدة هتتقلب بالعربية وش.. متقوليش انا بدرفت و لا حمشي العربية بجنبها.. زي فحاتين السعودية دول كفرة و بيعملوا حوادث اكتر ما بيسوقوا..
لو انت مانيوال مش هتحتاج الهاند
بس لو اوتو هتحتاجها .. قولي ليه ؟
وارجع تاني و اقولك ..
أول حاجة مهما كانت السرعة اللى انت ماشى عليها
ارفع أول تكة فى فرامل اليد متخفش مش هتأثر جامد ولا العجل اللى ورا هيقف يعنى مفيش خطر هى بس هتأيد حركة العجل اللى ورا و تمسكة شوية تلجمة و تتبت فيه ..
4 - لو انت اوتو و معدى ال 150 هات ال N لحد لما تنزل ل 120 و هتروح قالب الفتيس على الوضعية ستيب ترونيك و 10 ثواني كدة تروح ضارب (-) تنزل بيها خطف من 4 ل 3 ل2 لحد الاول... وبكدة انت لميت نفسك و لحقت الدنيا نفس فكرة الفتيس المانيوال بس فى الاوتو لازم تكون حريص و متخليش صوت الموتور يعلى و لما تنزل على 40 مثلا او 30 شد الهاند بتاعتك لحد الاخر مرة واحدة و امسك دريكسيونك كويس و العربية هتقف فى مكانها وقتي .. 😉
و ربنا يستر طريقنا و طريقكم .. و يبقي عنوانكم السلامة دايما في كل وقت.. و اللي محتاج اي استفسار او اي حاجة انا تحت امره.. قولوا متتكسفوش و انا معاكم
و انا معاكم
مسائكم جميل و بيضحك ان شاء الله 😘🌸🌹
إرسال تعليق